«У Пуціна ёсць тры прычыны, каб замітусіцца»

Акно магчымасцяў неўзабаве зачыніцца.

Расейскае акупацыйнае войска атрымала акно магчымасцяў і напэўна захоча скарыстацца ім. У першую чаргу размова ідзе аб сітуацыі, калі пастанова аб наданні Украіне вайсковай дапамогі ад ЗША прынятая ўжо, але да яе рэалізацыі застаецца пэўны час.

Сярод прычын актывізацыі войск РФ і чарговая «сакральная» дата - 9 траўня. Прыярытэтам для Крамля па-ранейшаму застаецца захоп Данецкай вобласці ў адміністрацыйных межах, адзначае ў эксклюзіўным інтэрв'ю (OBOZ.UA) судырэктар праграм замежнай палітыкі, каардынатар міжнародных праектаў Цэнтра Разумкова, вайсковы эксперт Аляксей Мельнік.

- Прэзідэнт Украіны Зяленскі паведаміў, што ЗША перададуць Украіне дальнабойныя сістэмы ATACMS. У гэтым пытанні ёсць як вайсковы, так і палітычны складнік. Вайсковы - як гэта можа змяніць расстаноўку сіл на полі бою? Палітычны - ці значыць гэта, што, зыходзячы з далёкасці ракет, ЗША фактычна не супраць, каб Украіна наносіла ўдары па тэрыторыі Расеі?

- Калі казаць пра вайсковы складнік, то тут сітуацыя больш-менш зразумелая, бо гэта менавіта тая зброя, у якой цяпер крытычна мае патрэбу Украіна. Пры адсутнасці належнага ўзроўню авіяцыйнай складніку Украіна здольная кампенсаваць гэта ракетамі далёкага дзеяння і беспілотнікамі.

Што тычыцца другой часткі пытання, мне здаецца, заўчасна казаць аб тым, што Злучаныя Штаты, адміністрацыя Байдэна, змянілі сваю пазіцыю што да агаворак наконт нанясення ўдараў па міжнародна прызнанай тэрыторыі Расеі. Але, улічваючы, што колькасць такіх ракет, відаць, будзе ўсё ж абмежаваная, дык нават на акупаваных тэрыторыях, у тым ліку ў Крыме, ёсць шмат «смачных» цэляў для такіх удараў.

Напрыканцы хацелася б усё ж выказаць агаворку: галоўнае, каб паміж заявамі і фізічнымі пастаўкамі гэтых ракет не было занадта доўгага перыяду.

- Як раз у гэты перыяд паміж прыняццем пастаноў і іх рэалізацыяй. На вашы ацэнкі, якой можа быць тактыка і стратэгія ворага менавіта ў гэты час, калі Украіна яшчэ не атрымала дапамогу ад ЗША? Што супраціўнік будзе рабіць зараз?

- Адназначна, што фактар прыняцця пастановы аб наданні амерыканскай дапамогі будзе стымуляваць расейскае кіраўніцтва да павышэння інтэнсіўнасці наступальных аперацый, нанясення ўдараў з дапамогай «Шахедаў» і ракет. Але гэта не адзіны фактар, які ўплывае на эскалацыю сёння.

Расея ўсяляк спрабуе выкарыстоўваць гэтае акно магчымасцяў. Гэта таксама супадае з сезонным фактарам, гэта значыць, з паляпшэннем умоў правядзення наземных аперацый, павелічэннем працягласці светлавога дня і т.д. Гэта цэлы комплекс фактараў.

Але адназначна можна казаць, што Расея паспрабуе максімальна скарыстацца акном магчымасцяў, якое, дарэчы, зусім не зачыняецца, а толькі прыадчыняецца. Бо большасць экспертаў сыходзяцца на тым, што гэты аб'ём дапамогі не вызначальны, ён не дазволіць пераламаць сітуацыю, перахапіць стратэгічную ініцыятыву ў тэатры баявых дзеянняў.

- Які кірунак на сёння з'яўляецца найбольш пагрозлівым, напрыклад, і з пункту гледжання набліжэння да чарговай «сакральнай» даты - 9 траўня?

- Па-ранейшаму прыярытэтам для расейскага вайскова-палітычнага кіраўніцтва з'яўляецца захоп Данецкай вобласці ў адміністрацыйных межах. Ці здольныя яны выканаць гэтую задачу, як вы правільна сказалі, да «сакральнай» даты, будзе залежаць не толькі ад палітычных установак, але і ад таго, наколькі Сілы абароны здольныя супрацьстаяць такому наступу.

Калі ж казаць пра найбольш пагрозлівыя кірункі, то нічога новага не з'явілася, акрамя таго, што дынамічна развіваецца не толькі ваенная, але і інфармацыйная аперацыя на Харкаўскім кірунку.

- Як вы думааеце, ці ёсць лагічная сувязь паміж перадачай Украіне дальнабойных ATACMS і знішчальнікаў F-16? Я маю на ўвазе, калі далі першае, дык нарэшце дадуць і другое?

- Пытанне F-16 было разгледжанае мінімум год таму. То бок, палітычна.

- Так, але ва Украіне мы іх дагэтуль не бачым.

- Ключавой перашкодай была палітычная пастанова. Мы знаходзімся на этапе тэхнічнай імплементацыі гэтай пастановы. Дэталі ўжо былі распісаныя рознымі экспертамі і СМІ. Таму зараз адзінае, на што, магчыма, варта звярнуць увагу, - наменклатура ўзбраення, якое будзе пастаўленае разам з F-16.

У першую чаргу далёкасць ракет «паветра-паветра», бо іх спектр дастаткова шырокі. Для Украіны сёння крытычна важна, каб гэтыя самалёты былі забяспечаныя таксама магчымасцю наносіць удары па паветраных цэлях на далёкасць 150 кіламетраў і больш.