Колькі грошай скраў Лукашэнка?
26- 27.04.2024, 12:09
- 16,072
І дзе іх хавае.
За час знаходжання Лукашэнкі ва ўладзе многія СМІ, эксперты і іншыя рэсурсы агучвалі вельмі розную інфармацыю аб імаверных актывах дыктатара.
«Зеркало» прыводзіць ацэнкі магчымага багацця дыктатара.
У чэрвені 2006 года амерыканскі амбасадар у Беларусі Джордж Крол адправіў у Вашынгтон дэпешу са спісам 50 найбагацейшых людзей Беларусі. Гэты дакумент апынуўся сярод 1014 дыпламатычных тэлеграм з сакрэтнага архіва дзярждэпартамента ЗША і Пентагона, якія ў выніку выцеку патрапілі ў распараджэнне праекта WikiLeaks Джуліяна Асанжа. У 2010 годзе WikiLeaks апублікаваў гэтую дэпешу.
Паводле яе, Аляксандр Лукашэнка ўжо ў 2006 годзе ўзначальваў спіс найбагацейшых людзей Беларусі: амерыканскія дыпламаты ацанілі яго багацце на дзевяць мільярдаў даляраў.
У жніўні 2011 года расейскі тэлеканал НТВ апублікаваў трэцюю частку дакументальнага фільма-расследавання «Хросны бацька». У ім сума багацця Лукашэнкі ацэньвалася ад васьмі да 12 мільярдаў даляраў.
У расследаванні 2014 года, апублікаваным на сайце французскага тэлеканала France 24, міжнародная каманда журналістаў з пяці краін ацаніла суму грошай, незаконна прысвоеных за 20 гадоў Лукашэнкам і яго найбліжэйшым атачэннем, на дзесяць мільярдаў даляраў.
У ліпені 2020 года расейскі палітолаг Андрэй Суздальцаў ацэньваў багацце сям'і Лукашэнкі ўжо на суму ад 12 да 16 мільярдаў даляраў. Як сцвярджаў тады Суздальцаў, да 2012 года грошы Лукашэнкі захоўваліся ў Сірыі, дзе кіруе дружалюбны дыктатарскі рэжым Башара Асада. Але пасля пачатку грамадзянскай вайны ў гэтай краіне грошы Лукашэнкі адтуль вывелі. Іншая частка грошай нібыта знаходзілася на Кіпры - як меркаваў Суздальцаў, іх таксама давялося выводзіць пасля пачатку праверак з боку мясцовых уладаў. Палітолаг меркаваў, што запасы грошай Лукашэнкі ёсць таксама ў Катары і Аб'яднаных Арабскіх Эміратах.