Мішусцін запанікаваў праз дэфіцыт валюты ў РФ

У Расеі валютны кантроль прадоўжылі яшчэ на год.

У РФ валютны кантроль вайсковага часу падоўжаны яшчэ на год. Расейскі ўрад на ўказ Пуціна зацвердзіў пастанову, паводле якой найбуйнейшыя экспарцёры абавязаныя вяртаць у Расею і прадаваць большую частку валютнай выручкі да 30 красавіка 2025 года, адзначае The Moscow Times.

Як і раней, патрабаванне датычыцца 43 групаў кампаній ПЭК, хімічнай і лясной прамысловасці, збожжавай гаспадаркі. Яны павінны залічваць на свае рахункі ў расейскіх банках не менш як 80 адсоткаў валюты, атрыманай ад іх экспартных кантрактаў.

Адзінае патуранне – тэрмін залічэння валютнай выручкі на рахункі павялічаны з 90 да 120 дзён з перадачы нерэзідэнтам тавараў або выканання ім паслуг. Яно, відавочна, змушанае: праблемы з разлікамі ў вонкавым гандлі ўзмацняюцца. Тэрміны разлікаў выраслі, адзначаў намеснік старшыні ЦБ Аляксей Заботкін, цяпер яны ад аднаго да двух месяцаў, «бліжэй да двух». Потым патрэбны час на тое, каб перавесці гэтую выручку з замежных рахункаў у расейскія банкі.

Патрабаванне абавязковага продажу валютнай выручкі было ўведзенае ў кастрычніку 2023 г., каб спыніць падзенне рубля, які тады ўпаў ніжэй за 100 руб./$. Улады пазіцыянавалі яго як часавае: яно дзейнічала да канца красавіка. Але ўжо на пачатку года чыноўнікі загаварылі, што трэба яго падоўжыць.

«Валютныя камісары» з Расфінманіторынгу заявілі, што скасаваць патрабаванне аб абавязковым продажы было вельмі цяжка: гэта стала б наймацнейшым ударам па валютным рынку, які быў упэўнены ў падаўжэнні. Набіуліна толькі спадзявалася на паступовае паслабленне патрабаванняў: «Гэта яшчэ і адміністрацыйныя складанасці для бізнэсу. У нас цяпер і так праблемы з плацяжамі, калі трэба канвертаваць і ажыццяўляць плацяжы ў адзін-другі бок. Гэта дадатковыя санкцыйныя рызыкі і абмежаванні».