Уезду ў ЕЗ з Беларусі чакаюць больш за 1,6 тысячы фургонаў

Час чакання - 100 гадзін.

На 16:00 6 траўня ўезду з Беларусі на тэрыторыю сумежных краін ЕЗ чакалі 1630 грузавых аўтамабіляў, з іх 1050 у Літву, 480 - у Латвію, 100 - у Польшчу. Такія звесткі абнародаваў Дзяржаўны памежны камітэт, паведамляе «Белсат».

Паводле інфармацыі ДПК, за выходныя дні ў Літву прайшлі прыблізна 34% грузавікоў ад нормы. Менш за ўсё аформілі супрацоўнікі пераходу «Меднікі - Каменны Лог» - 17% аўто. Праз адзіны функцыянуючы латвійскі пункт пропуску «Патэрніекі - Грыгараўшчына» ў краіны ЕЗ за два дні ўехалі 43% грузавікоў. Польскі бок у «Кукурыках - Казловічах» прапусціў 58% фургонаў ад нормы. Час чакання ў чарзе ацэньваюць прыблізна на 100 гадзін.

Паглядзім на суіснаванне з аўтобусамі і легкавымі аўтамабілямі. Перад польскім пунктам пропуску «Тэрэспаль - Берасце» фіксуецца чарга з 35 аўтобусаў і 250 аўто. Перад літоўскімі пагранпераходамі “Меднікі – Каменны Лог” і “Шальчынінкай – Беняконі” ўезду чакаюць 80 і 120 легкавушак адпаведна.

Летась да лютага на мяжы з Польшчай працавалі два памежныя пераходы, аднак праз прысуд журналісту і аднаму з лідараў польскай дыяспары Анджэю Пачобуту пункт «Баброўнікі - Бераставіца» закрылі. Тагачасны міністр унутраных спраў і адміністрацыі суседняй краіны Марыюш Каміньскі паставіў умову: аднаўленне працы тэрмінала за вызваленне палітвязня. У Менску палічылі, што закладнік за кратамі важнейшы, чым бесперашкодныя паездкі беларусаў у Польшчу.

18 жніўня 2023 года Літва закрыла пункты пропуску «Шумскас - Лоша» і «Твярачус - Відзы», 1 сакавіка 2024-га - «Лаварышкес - Катлоўка» і «Райгардас - Прывалка», абгрунтаваўшы гэта захадамі бяспекі. На мяжы з Беларуссю працягваюць працаваць толькі два пагранпераходы - «Меднікі - Каменны Лог» і «Шальчынінкай - Беняконі».

Магчымасць патрапіць у Літву на цягніку Менск - Калінінград таксама закрылі. Пасадка і высадка пасажыраў на чыгуначных станцыях Кена і Кібартай спыненая.

Закранулі змены і рэгулярныя рэйсы. Колькасць дазволаў беларускім і літоўскім перавознікам скарацілі да 29. Нерэгулярны транспарт з дзявяццю і больш месцамі таксама зараз павінен мець дазвол.

З леташняга верасня толькі адзін пункт пропуску працуе на мяжы Беларусі з Латвіяй - закрыццё другога тэрмінала ў Рызе назвалі адказам на міграцыйны крызіс.