На «Гродна Азоце» забароняць карыстацца смартфонамі і мабільным інтэрнэтам

Падрабязнасці.

На «Гродна Азоце» і прадпрыемствах, у якіх ён выступае заснавальнікам, супрацоўнікам неўзабаве забароняць карыстацца смартфонамі і выходзіць у інтэрнэт. Дакумент, падпісаны гендырэктарам Ігарам Ляшэнка, трапіў у распараджэнне «Люстэрка». У ім – загад выдаць усім супрацоўнікам, мяркуючы з усяго, кнопкавыя тэлефоны і карпаратыўныя сім-карты – на тэрыторыю прадпрыемства можна будзе праходзіць толькі з імі. Гэта наступствы атакі «Кіберпартызанаў»? Расказваем дэталі.

Супрацоўнікам – новыя гаджэты. Бухгалтэрыі і службе бяспекі – спісы прозвішчаў і заявы

У дакуменце, які трапіў у распараджэнні рэдакцыі, указана, што працаўнікоў «Гродна Азота» з 1 ліпеня 2024 года не будуць прапускаць на тэрыторыю са смартфонамі, у якіх ёсць выхад у інтэрнэт. У працоўны час супрацоўнікам будзе дазволена карыстацца тэлефонамі, па якіх можна тэлефанаваць, перадаваць SMS і MMS – верагодна, гаворка пра кнопкавыя тэлефоны. Выключэнне зрабілі толькі для асобнай групы супрацоўнікаў, але пра гэта пазней.

Загад падпісаны гендырэктарам «Гродна Азота» Ігарам Ляшэнкам і выпушчаны 26 красавіка. Тэкст склалі паводле пратакола «пашыранай вытворчай нарады», якую праводзілі 17 красавіка – менавіта ў той дзень «Кіберпартызаны» паведамлялі пра маштабную атаку на прадпрыемства.

Як пазначана ў дакуменце, захады ўжываюцца для абмежавання магчымасці супрацоўнікамі «фотавідэафіксацыі і выкарыстання інтэрнэт-рэсурсаў». А таксама «ў мэтах забеспячэння бесперабойнай працы структурных падраздзяленняў, аператыўнага прыняцця супрацоўнікамі прадпрыемства пастановаў у кірунках вытворча-фінансавай дзейнасці».

Паводле новых нормаў усім структурным падраздзяленням павінны са склада выдаць мабільныя тэлефоны «стандарту 2G». У дакуменце не ўказваецца, ці можа быць у гаджэтах камера для здымкі фота і відэа, але размеркаваць іх павінны былі да 29 красавіка. Папярэдне кіраўнікам гэтых падраздзяленняў трэба было скласці спісы супрацоўнікаў, ад кожнага супрацоўніка – абавязкова аформіць заяву і абавязальніцтвы ў выкарыстанні. Арыгіналы спісаў і заявы да 3 траўня чакалі ў бухгалтэрыі, копіі – дадаткова ў службе бяспекі і цэху сувязі.

Адзначаецца, што калі ў супрацоўнікаў з'яўляецца «вытворчая неабходнасць падключыцца да інтэрнэту са смартфонаў», спіс іх прозвішчаў у дакладной запісцы павінны накіраваць кіраўніку службы бяспекі. Прычым папярэдне ўзгадніўшы з намеснікам гендырэктара падраздзялення, да якога гэтыя супрацоўнікі адносяцца.

Да тэлефонаў прыкладаюцца карпаратыўныя сім-карты – іх падключылі да аператара МТС, на тарыф «Разумны бізнэс 1.0». Пры гэтым «Гродна Азот» атрымала вялікую зніжку – 70% ад дзейнага тарыфу. Характэрна, што ён прадугледжвае і 250 мегабайтаў інтэрнэт-трафіку, але для гроднаазотаўцаў ён будзе заблакаваны.

Нагадаем, 17 красавіка гендырэктарам МТС стаў экс-кіраўнік КДБ у Менску і вобласці Уладзімір Козыр.