Вялікая Брытанія высылае расейскага вайсковага аташэ
8- 8.05.2024, 17:06
- 4,078
Лондан назваў яго «афіцэрам вайсковай выведкі».
Улады Вялікай Брытаніі збіраюцца выслаць вайсковага аташэ Расеі з краіны ў адказ на тое, што міністр унутраных спраў Джэймс Клеверлі назваў «зламыснай дзейнасцю» Масквы, піша Reuters.
«Мы вышлем расейскага вайсковага аташэ, неабвешчанага афіцэра вайсковай выведкі», — сказаў Клеверлі падчас выступу перад парламентам 8 траўня.
Акрамя таго, са слоў міністра, улады пазбавяць статусу дыпламатычных памяшканняў некалькі аб'ектаў нерухомасці ў Вялікай Брытаніі, звязаных з Расеяй.
Таксама Вялікая Брытанія ўвядзе новыя абмежаванні на выдачу расейскіх дыпламатычных віз, у тым ліку абмяжуе тэрмін знаходжання расейскіх дыпламатаў у краіне.
Са слоў міністра, Вялікая Брытанія стала «надзвычай складаным аперацыйным асяроддзем для расейскіх выведвальных службаў», але ўжытыя захады «толькі ўмацуюць нашу ўстойлівасць да расейскай пагрозы».
Клеверлі дадаў, што ў адказ на захады Вялікай Брытаніі чакае, што з боку ўрада Расеі будуць гучаць «абвінавачанні ў русафобіі, тэорыі змовы і істэрыя», але брытанскі ўрад «не будзе абдураны».