Кожны 24-ы жыхар Нью-Ёрка – мільянер

Сукупнае багацце яго жыхароў перавысіла $3 трлн.

Багацце жыхароў Нью-Ёрка перавышае $3 трлн, кожны 24-ы з іх - мільянер, піша Bloomberg са спасылкай на рэйтынг самых багатых гарадоў 2024 года, складзены кансалтынгавай кампаніяй Henley&Partners.

Паводле даследавання Henley&Partners, Нью-Ёрк заняў першы радок рэйтынгу, за ім ідуць вобласць затокі Сан-Францыска (уключае ў сябе Сан-Хасэ, Сан-Францыска і Апала-Альта), Токіё, Сінгапур і Лондан. Дубай размясціўся на 21-м месцы. Усяго ў спісе знаходзяцца 50 гарадоў.

У Нью-Ёрку налічылі блізу 350 тысяч мільянераў, што на 48% больш за паказчык 2013 года. «Гэта азначае, што прыкладна кожны 24-ы з 8 260 000 жыхароў мае сямізначны чысты капітал у параўнанні з прыкладна кожным 36-м у 2013 годзе», – піша Bloomberg. Таксама, паводле звестак Henley&Partners, у горадзе застаецца вялікая доля звышбагатых жыхароў - 60 мільярдэраў і 744 чалавекі з багаццем, большым за $100 млн.

У вобласці затокі Сан-Францыска налічылі 305,7 тысячы мільянераў (рост на 82% у параўнанні з 2013 годам), у Токіё - 298,3 тысячы (мінус 5%), у Сінгапуры - 244,8 тысячы (плюс 64 %), у Лондане - 227 тысяч (мінус 10%).

Гендырэктар Henley&Partners. Юрг Штэфан заявіў, што развіццё самых багатых гарадоў у апошнія гады стымулявалі высокія паказчыкі фінансавых рынкаў. «Рост S&P 500 на 24% летась нараўне з ростам Nasdaq на 43% і ашаламляльным ростам біткоіна на 155% умацавалі багацце багатых інвестараў. Акрамя таго, імклівы прагрэс у галіне штучнага інтэлекту, робататэхнікі і тэхналогіі блокчэйн даў новыя магчымасці для стварэння і назапашвання багацця», - сказаў ён.

Аднак у шэрагу гарадоў назіралася адваротная тэндэнцыя. Напрыклад, Лондан страціў 10% мільянераў, у тым ліку праз пастанову Вялікай Брытаніі выйсці з ЕЗ, піша Bloomberg. Скарацілася і іх колькасць у Ганконгу на 4%, бо забяспечаныя людзі пасля пандэміі масава пераехалі ў Сінгапур.

Сярод гарадоў, якія знаходзяцца на ўздыме, - кітайскі Шэньчжэнь, дзе колькасць мільянераў за дзесяць гадоў вырасла на 140%. Больш чым удвая павялічылася іх колькасць у Бангалоры (Індыя), Хашэміне (В'етнам) і Скотсдэйле (ЗША), адзначае агенцтва.