У Польшчы выпусцілі на маршрут беспілотныя электрычныя аўтобусы

Як яны выглядаюць.

У Польшчы пачалі эксплуатаваць беспілотныя пасажырскія аўтобусы Спачатку іх некалькі месяцаў тэставалі без пасажыраў, а з 26 красавіка запусцілі першы паўнацэнны маршрут у горадзе Катавіцы. Пра гэта паведамляе сайт katowice24.

На маршруце курсуюць электрычныя аўтобусы Blees BB-1. Яны будуць вазіць пасажыраў ад вуліцы Французская да гарадскога парка ў Даліне трох сажалак у будні з 8.00 да 16.00. Працягласць маршруту складае 2 км.

Аўтобусы будуць перамяшчацца па маршруце ў поўнасцю аўтаномным рэжыме, аднак у кабіне будзе заставацца кіроўца-аператар, які зможа пры неабходнасці ў экстрэмальнай сітуацыі ўзяць кіраванне на сябе. Абумоўлена гэта тым, што ў парках Катавіцы нямала веласіпедыстаў і ролераў.

Пілотная эксплуатацыя Blees BB-1 з невялікімі перапынкамі працягнецца да 3 чэрвеня. Пасля гэтага гарадскія ўлады вызначацца, ці пакідаць маршрут.

Аўтобус некалькі месяцаў тэставалі без пасажыраў

Беспілотны аўтобус BB-1 распрацаваны кампаніяй Blees з польскага горада Глівіцэ. Ён разлічаны на 15 пасажыраў і здольны развіваць хуткасць да 25 км/г. Акумулятарная батарэя на 58 квт∙г забяспечвае запас ходу на 200 км.