На выездзе з Польшчы ў Беларусь вялікія чэргі

Плынь кантралюе паліцыя.

У Польшчы набліжаюцца доўгія травеньскія выходныя, на якіх многія беларусы, што жывуць і працуюць у гэтай краіне, традыцыйна наведваюць радзіму. Праз гэта чарга легкавых аўтамабіляў на выездзе з Польшчы ў Беларусь вырасла. Да вечару 30 красавіка адлегласць ад хваста чаргі да пераходу «Цярэспаль» перавысіла 4 кіламетры, выезду чакаюць 550–580 машынаў. Што цяпер адбываецца перад пунктамі пропуску, расказвае MOST са спасылкай на памежныя чаты.

У чатах удзельнікі расказваюць, што праходжанне мяжы займае больш за 20 гадзінаў, а ў асобных выпадках – больш за дзень, і можа павялічвацца – усё больш людзей збіраюцца ў дарогу, скончыўшы працоўны дзень.

«Усім, хто сёння збіраецца ехаць праз Цярэспаль: можаце не ехаць, чарга на дні тры», – напісаў адзін з удзельнікаў чату МяжаBY.

«Яны чэсна спрабавалі падмануць, што стаялі ў чарзе»

Праходжанне мяжы задоўжваюць тыя, хто спрабуе ўклініцца без чаргі, аднак з імі змагаюцца як шараговыя турысты, якія аб'ядноўваюцца ў добраахвотніцкія групы, так і польская паліцыя.

«Учора днём паліцыянты прыехалі на”цэнтрум” (выезд з прылеглай тэрыторыі недалёка ад шлагбаўма пункта пропуску. – Заўв. рэд.), адзін у аўто перакрыў выезд, а другі ад выезду выйшаў да шлагбаўма і зняў на тэлефон усе машыны, якія стаялі ў чарзе. Потым пару разоў пад'язджалі, і ён выходзіў і параўноўваў машыны ў чарзе з машынамі на відэа. Аднаго вырвалі, штрафанулі і выправілі ў канец “калейкі”», – напісаў адзін з карыстальнікаў.

«Запусцілі пачку і потым знялі на тэлефон хвост чаргі. З'ехалі патруляваць на 20 хв. За гэты час тры аўто на першым рэгіёне (нумары Берасцейскай вобласці. – Заўвага. рэд.) прыстроіліся ціхенька. Паліцыя праехала па коле і вярнулася да іх. Яны чэсна спрабавалі падмануць, што стаялі ў чарзе. Але малады паліцыянт выразна адпрацаваў іх. Сабраў пашпарты ў кіроўцаў, аформіў нейкія паперы і раздаў назад, запатрабаваў пераехаць па коле і стаць у канец чаргі», – пацвярджае іншы.

«У начны час будзе толькі горш»

Тым не менш дасведчаныя вандроўцы раяць не спадзявацца на паліцыянтаў, а рэгуляваць чаргу самім. Стыхійныя каманды добраахвотнікаў не дазваляюць нядобрасумленным кіроўцам праязджаць без чаргі.

«Усе, хто ў канцы чаргі, арганізоўвайцеся самастойна, не спадзявайцеся на вартавых, якія прыедуць і разруляць сітуацыю. У каго ў машыне некалькі чалавек, выпраўляйце іх дзяжурыць уздоўж чаргі і асабліва на коле, паварот на Окшын (паказальнік на гэты на населены пункт служыць арыенцірам на трасе каля мяжы. – Заўв. рэд.), выезд з “цэнтруму”. Самі з ролікаў бачыце, як там нахабнічаюць. Гэта ваш шанец праехаць, пакуль светла, у начны час будзе толькі горш», – папярэджвае беларус.

Рэч у тым, што ноччу многія кіроўцы засынаюць і не рухаюцца своечасова. Праз гэта ў чарзе ўтвараюцца зазоры, у якія лёгка ўбудавацца без чаргі.

«Мы стаялі ў чарзе 28.04 амаль 5 км, мужчыны – малайцы, ім асобная падзяка, кантралявалі чаргу, каб ніхто не ўлез нахабна ў разрыў. А калі нехта прымудрыўся ўлезці, тут жа падыходзілі і выганялі з чаргі. Арганізавана выйшлі на кола і да Duty Free, мы хоць і рухаліся патрошку, але практычна ўвесь час», – дзеліцца досведам удзельнік чату.