«Капейкі? У мяне на будоўлі выходзіць не нашмат больш за поўны працоўны дзень»

Колькі ў Беларусі можа зарабіць 14-гадовы падлетак?

«Каб знайсці прадаўцоў квасу на пяць пунктаў, трэба запісаць 40 чалавек»: колькі ў Беларусі можа зарабіць 14-гадовы падлетак?

У цік-ток myborisov з'явілася відэа з кірмашу вакансій у барысаўскай школе № 25. Былі і варыянты, якія пасуюць школьнікам.

Напрыклад, на кірмаш у пошуку патэнцыйных супрацоўнікаў завітаў прадпрымальнік, якому патрэбныя прадаўцы квасу. Ён расказаў, што наймае школьнікаў з 2016 года. Бярэ ў асноўным тых, каму ад 14 да 16 гадоў, але, бывае, і дзеці малодшага ўзросту хочуць зарабляць грошы. У гэтым выпадку прыватнік ідзе насустрач.

- Гэта пасільная праца для навучэнцаў. Рабочы час мяняецца. У мяне няма цвёрдай прывязкі, што трэба пяць дзён на тыдзень з такога да такога часу. Як правіла, я на адным пункце падзяляю працоўны дзень на палову.

Ахвочых прадаваць квас у спіс запісалася нямала. Аднак прадпрымальнік адзначае: зыходзячы з ягонага досведу, каб знайсці прадаўцоў на ўсе яго 5 рунктаў у Барысаве, трэба запісаць чалавек 40.

- З іх палова забудзе і не патэлефануе мне. З тых хто патэлефануе і прыйдзе па накіраванне на медкамісію, частка палянуецца праходзіць медкамісію.

Плаціць маладым прадаўцам прадпрымальнік абяцае 10% ад даходу. Кажа, што ў сярэднім летась гэта атрымлівалася 25 рублёў за дзень (ад 20 да 45 рублёў).

Меркаванні каментатараў падзяліліся. Нехта мяркуе, што такі заробак недастатковы за працу на спякоце. Іншыя ўпэўненыя, што для дзіцяці гэта адэкватныя грошы. Усё ж ніякіх асаблівых уменняў і ведаў для такой працы не патрабуецца: «Гэта выдатная магчымасць зарабіць на свае жаданні і матывацыя добра вучыцца, каб мець іншую працу і заробак».

Нехта абурыўся таму, што 25 рублёў за 4 гадзіны працы называюць капейкамі: «Капейкі? Гэта нармальна. У мяне на будоўлі выходзіць 60-65 рублёў за поўны працоўны дзень».