«Згубленыя» працы братоў Грымаў знайшлі ў бібліятэцы польскага Універсітэта імя Адама Міцкевіча

Меркавалася, што яны былі згубленыя пасля Другой сусветнай вайны.

Даследнікі знайшлі працы братоў Грымаў у бібліятэцы Універсітэта імя Адама Міцкевіча. Тэксты ўважаліся за страчаныя падчас Другой сусветнай вайны, паведамляе Heritage Daily.

Браты Грымы, Якаб і Вільгельм, былі нямецкімі навукоўцамі, якія збіралі і публікавалі казкі нямецкага фальклору, такія як «Гензэль і Грэтэль», «Прынц-жаба», «Чырвоны Каптурок», «Рапунцэль», «Румпельштыльцхен» і «Заснулая прыгажуня». Спадчына братоў Грымаў уключае ў сябе легенды, аповесці і народныя паданні. Большасць з іх не задумваліся як дзіцячыя казкі.

Многія працы братоў Грымаў уважаліся за згубленыя пасля Другой сусветнай вайны. Але цяпер у бібліятэцы Універсітэта імя Адама Міцкевіча атрымалася выявіць 27 арыгінальных тамоў.

Працы складаюцца з рэдкіх друкаваных і ўнікальных выданняў, якія з'яўляюцца асабліва каштоўнай крыніцай, што паказвае даследчыя метады, якія выкарыстоўваліся братамі. У зносках і паказальніках абодва браты падавалі пісьмовы зыходны матэрыял, а таксама рукапісныя нататкі і анатацыі.

«Доўгі час меркавалася, што тамы, знойдзеныя ва ўніверсітэцкай бібліятэцы, былі згубленыя падчас Другой сусветнай вайны. Іх унёсак у развіццё сучасных даследаванняў літаратурнай і навуковай дзейнасці мае значную каштоўнасць. Сам факт іх выяўлення дазваляе нам меркаваць, што ў кніжных зборах бібліятэкі могуць знаходзіцца і іншыя тамы, якія належалі прыватнай кніжнай калекцыі Якаба і Вільгельма Грымаў», – заявілі даследнікі.

Мяркуецца, што тамы патрапілі ва ўніверсітэцкую бібліятэку ў Познані ў пасляваенны перыяд праз перамяшчэнне бібліятэчных фондаў.